Rev. Van Thawng Lian

Ka hmin cu Rev Van Thawng Lian Heccae ka si. Ka nupi cu Thawng Za Tling Heccae asi. Ni 05/08/2014 ah Australia kan ra thleng. Pathian zangfahnak ruangah 15/01/2018 ihsin Adelaide Lai Christian Church ah Pastor ka ṭuan thok. Khrih Jesuh sungah hleihdan awknak umlo, unau suahpi vekin hmunkhat ah in ko khawm ih ALCC kawhhran pakhat sungah taksa ṭhen pawl bangin hnaṭuan tlang dingah caan ṭha sunglawi in petu Pathian hming thangṭhat in um seh.

Kawhhran timi cu Pathian in a sunlawinak hrangah ko suah mi zumtu um khawm asi bangtukin kan Bawipa Jesuh Khrih thupek ropi vekin leilung tlun mi hmuahhmuah hnenah thuthang ṭha sim ih thlarau hlo kai le dungthluntu sersuah ding hi ALCC din san le tumtah mi si hram seh. Pathian thu in atu kan san cu sansia a si ruangah caan ṭha nan neih mi kip kha man nei zet in hmang uh tiah a ti bangin Zumtu pakhat kan sinak ah bomh mi le ngah lam lawng beisei tu si hnakin mi bawmtu si hi thlawsuah a tam deuh.

Peknak ah Pathian cu zokhal in neh ban thei lo mi asi bangtuk in ṭhenhra ṭhenkhat sithokin peknak dang hmuahhmuah ah siangzet in nung awla farah le hlawhsam in na um dah lo ding. Khawm daithlang cu Pathian dodal ci khat asi ruangah Joshua le a innsang bangin khawm teima awla san thawng tampi tiang mi thlawsuah sungkua na si ding. Pathian cu Thlarau asi ih lei taksa mit in hmuh thei, tham thei mi silo hmansehla na biak mi Pathian ah rinhmainak nei lo in Amah cu tlaihsan in zum awla mangbang za Pathian sunlawinak kutcak hmu ringring tu mi neinung le mi thlawsuak na si ding.

Pathian hnaṭuan hi hna hmuahhmuah lakah hna sungbik asi vekin minung hmang in Pathian in a lo hril sung ah ka rian mi ngaingai cu Bawipa asi ti thei in harsatnak le dodalnak phunphun lakah term cem hlan beidong in cawl tum hnuaihni loin teima zetin ṭuan awla thlawsuah lethnih co tu na si ding.

 Thlacam cu nunnak thaw vek, Pathian kan biak nak asi ih Bible siar cu rawl-ei vek, Pathian in, in biaknak asi bangtukin san thawng tampi tiang a nung dam mi kawhhran asi thei nak dingah zumtu pawl thlacam le Bible siar daithlang hlah uhsi.

Kawhhran cu thil ziangkim bulṭanhnak asi ve vekin kawhhran sung ihsin thlarau le taksa lam mifim, mithiam, rinsantlak le Pathian duh ih ṭihzahtu zumtu ṭha tampi suah ter tu dingah hruaitu pawl cu Pathian siahhlawh kan si zia thei in Jesuh rat sal caan tiang rinumten duhdawtnak thawn hnaṭuantu ṭha si ding zuam uhsi.