NAUHAK UM LONAK KOHHRAN HMAILAM CU A TAWP A SI

NAUHAK UM LONAK KOHHRAN HMAILAM CU A TAWP A SI

By/ Van Bawi Sung

Khawitawk kawhhran khal ih kan sim ringring theu mi cu, “Nauhak an thupibik” ti hi a si theu. Asinan, thupibik ih kan ret le ret lo cu kawhhran in nauhak hrang hna a tuandan par ah alang. Thupibik in ret hmansehla tuahnak in a lang lo cun thupibik ih ret lo thawn a bang aw asi. Cule nauhak pawl kum 18 an ra kim hnu biakinn thleng an um nawn tuk lo asile, cui kawhhran cun a tuah ding mi a tuah lo ih hlei ah a hmailam cu a tawp rero tinak a si. Children’s pastor Dale Hudson cun, “Mino kum 18-25 kohhran tlansantu rate a sang vivo, an kum a run upa vivo ih, an zumnak an tlansan vivo. A thawk ihsin zumnak ngaingai neilo in, an nu le pa ih sim mi vek an tuah ih, khawm ding ti caan ah an khawm, an mah nun sung ngaingai ah Khrih nei lo in, nu le pa ih zumnak an thlun men ruang ah, nu le pa ih sim thei nawn lo kum rual an run si cun tuah dan theu pawl hmuahhmuah kha an tlansan theh a si,” a ti. Nu le pa in ruah ding thukzet kan nei thlang. Nauhak/Kan fale biakinn thleng taima kan ti pawl hi an mah le Pathian karlak pehzawmnak an nei ngaingai ke maw? Nu le pa in ttih hrih ruang ah tuah ding ih kan fial mi pohpoh an tuah rero sung maw a si? An mai nun ah Jesuh an nei ngaingai ruang ah an tuah mi a si maw, asilo ahcun kohhran lawng silo an zumnak an tlansan vivo ding a si. Ruah ding a tam nasa.

Hills Bible Church zingzawitu pawl cun, leitlun zumtu mi piangthar (Christian) 85% pawl hi kum 18 an kim hlan ih rundamnak cotu pawl an si a ti. Kum 18 tang khal ah kum 13 tang lei hi rundamnak an fiang a awl hleice ti a si. Kum 18 kan kim hnu cun khawruahnak a tam ih, duh mi, daw mi, a tam vivo, hnatuan tla tul vivo thawn kan thinlung in Pathian thu a ruat man nawn lo ih, kan taksa hrang tul mi sawn ah caan kan pe tam sawn ruang ah rundamnak thuthangtha ngainak hrang kan nauhaklai vek in kan pe thei nawn lo tinak a si. Cuiruangah Children’s Ministry hi kawhhran in a tak ih a ret thupit a tul ih, nauhak pawl ih zirhtu naibik le thabik a si mi inn lei ih a um pi tu, nu le pa, an mah umtu pawl thawn tuantlang, tanlak tlang hi a pawimawh ngaingai a si. Thupi ti men ih kan cemter asile kawhhran hmailam cu a tawp ding a si. Tu ih upa pawl kan hung upa vivo ding ih, kan tar vivo ding, kan thi leh ding, biakinn tiang midang then lole zuar a tul leh ding mi khi a si. Cu mi hnak ih riahsia umzet mi cu kan fale pawl hell feh ding mi hi a si.

Kan thupi, “Nauhak um lonak kohhran hmailam cu a tawp a si,” kan ti tik ah sim duh mi ngaingai sawn cu, “Nauhak ministry ret thupi lonak kawhhran hmailam cu a tawp/thi a si,” ti duhnak a si. Atu ih kawhhran kan umnak Sunday School Nauhak pawl kan fehpi dan vun ruatsal ciau sehla, thupi ah kan ret ngaingai tin kan ruat maw? Jesuh san lai ihsin nauhak hi zianghman ih siar lo mi an rak si ringring. Hngilh mi an rak si ringring. Kan kawhhran umnak ciau in teh nauhak ziangtluk in kan ret pawimawh? Kaa lawng ih “A thupituk” titu men kan si pang maw? Jesuh cun, “Nauhak pawl kha kham hlah uh, ka hnen ah rak hruai uh,” a ti. “Nauhak pawl” a ti tik ah “Disability/ Special needs child” tiang in an tel theh a si. Kan umnak kawhhran hi nauhak pawl Jesuh hnen ih a hruaitu maw a si, a khamtu? Nu le pa teh, kan fale pawl Jesuh hnen a hruaitu maw a khamtu kan si? Khrih hrang caan an hman ding a khamtu teh kan si pang maw? Ruat ciamciam aw. Laimi nu le pa tampi kan palh mi cu, Pathian ih duhdan hnak in kan mai duhdan in kan fale rawngbawlnak ah tel ding kan duh. Kan duhdan asilocun fale in tuiin, kohhran lei ih hman duh hmansehla telter kan siang lo. Kan zate hin Pathian ta kan siih kan par ih thuthentu khal Amah Pathian a si. Kan fale kan support thiam a tulzet. Support thiam ti tik ah thlah zalen ciamco kha sim duh mi asilo a si. Kohhran khal in nauhak ministry a ret thupi lo ih, nu le pa khal in kan fale Jesuh hnen kan hruai theilo ahcun, tu hnu kum 30/40 kan dinhmun ding vun ruat sehla, a cem a si. Ruah ding a tam nasa.

Kawhhran hmailam a tawp ih a thi lonak ding ah kawhhran le nu le pa dinhmun in ziang kan tuahtlang thei? 

Deuteronomy 6 sung ih a ngan bang in, nauhak zirhtu tha diktak cu nu le pa kan si. Fale Pathian thutak zirhsawng vivo ih, fa an ra nei hnu ah an mai fale kha zirhsawng thei vivo tu an si ding tiang ih zirhtu kan si a tul a si (Deu 4:9). Kan laimi tamsawn cun Nauhak Sunday School zirhtu pawl hi kan fale thlarau nun kaihruaitu pakhatnak an si ah ruat in, inn lam ah zianghman kan tuah tum nawn lo theu. Bible ih sim vek in, Pathian kan zumnak fale hnen ih a zirhsawng vivo tu kan silo ahcun, Thutentu 2:10 ih a sim bang in, atu upa lam generation kan thi ding ih, nauhak pawl an hung upa vivo ding ih, Pathian nung thei nawn lo thangthar nonawn ah an ra cang ding a si. Tuksumza ngaingai a si. Kan hmailam caan hivek kan silonak ding ah Kawhhran khal in Sunday School fehtlang in nauhak pawl Pathian thu a zirh ding ih, nu le pa in inn lam ih an theitawk ih an rak bawm theinak ding resource a phunphun hmang in a bawm thei a si.  Nu le pa khal in Sunday School zarhkhat nazi pakhat sung zirh mi lawng ring loin inn lei ah kan fale kan zirh ve thei a si. Curuangah Kohhran cu nauhak nu le pa Pathian thu leiin an thansoh vivo nak hrang support pek tuanvo a nei ih, nu le pa in an fale inn ih Pathian thu zirh le an mah nun rori ih kai hruai hi an tuanvo a si. Cutin kohhran le nauhak nu le pa an tuantlang ahcun cui kohhran hmailam cu a nung ringring ding ih rah tha in a luangliam ding a si.

Nu le Pa in inn lamah ziangtin an fale an bawm thei ding?

  Ca ngantu pakhat cun, “Nu le Pa ih harsat mi cu CAAN timi an fa le hrang an nei lo ih hlei ah, ZIRH DAN tla an thiam lo ih, an harsat,” ti a si. Himi ahhin Kawhhran le nu le pa tuantlang a thupinak cu a fiang zo. CAAN pek thei thu ahcun kawhhran in ziang ti sak thei a nei lo nan, an fale Pathian thu an zirh thiam theinak ding ah Sunday School fehtlang in a bawm thei a si. Himi ah Kawhhran lala khal in Sunday School kha a support thiam ih ministry ih pawimawhbik ih a ret a tul ve a si. A zirhtu pawl hrang training a phunphun an kai ding mi tiang a support thiamsak a tulzet a si. Nu le pa leiin inn ih kan rak tuahve theidan cu Children’s Ministry kum reipi tuantu Sandy Galea cun step pathum in arak sim: (Nauhak an silai ihsi tuah pi ding mi),

1.     Family devotion caan tuah ih, Bible story siar tlan lole Bedtime Bible story siar (A cangthei asile zan it hlan ah tuah theu aw)

2.      Siar ngah mi ihsin thazang ngah mi pawl share tlang (Himi ahhin nu le pa khal in kan thazang ngah mi le kan nun ih Pathian hna a tuan dan experience kan nei mi tete share thei a thupizet a si. Cutin na tuah asile na zumnak ihsin na fale in an zir ding ih Pathian an zumnak khal a nghetter sinsin ding. Nauhak pawl khal zalen takin share ter hai aw. A caan le nangmah (nu le pa) ruang ih an thinnaunak le riahsiatnak tla an share thei, thinsauten ngaisak aw)

3.   Sungten lungawi thu sim thlacamnak nei. (A caan caan le family zaten thleithlak in thlacam)

Himi step pathum pawl inn lam ah kan tuahpi thei asi ahcun kan fale khal in nu le pa ih kan zum mi Pathian, an mah bulpak rori in an hmufiang ding ih, cui zumnak cu an damsung kai hruaitu tha a run si ding. Cuihlei ah kan fale hmailam cu a eng ding ih, kan family relationship khal a tha in a nuamzet ding. Fale khal in in rinsan sinsin ding ih in theithiam sinsin ding. Thil awl ai cu asilo, asinan fale hrang ruat in mah le tlin dan ih zirin kan tuahthei ding a thupi ngaingai. Kawhhran lei khal in mah le tlin dan tawkten Sunday School fehtlang in nu le pa a support theitu a si ahcun, kawhhran hmailei lawng silo, kan community, kan family hmailam cu a tawp ti a um dah lo ding ih, Khrih hrang a luangliam ih rah tha a rahtu kawhhran a si vivo ding a si. Pathian in siartu pawl lo thlawsuah seh! Amen.

Hminsin: Australia um pawl hrang atangta cabu hi Christian cabu dawr Koorong timi ah lei theih a si. Koorong dawr hawl awl dan bik cu GPS ah “Koorong” tin hawl awla arak lang mai ding.     

1.       The beginner’s Bible

2.     The Beginners’ Gospel Story Bible by Jared Kennedy (Kum 6-7 pawl siar thiam thei mi a si)

3.       The Jesus Storybook Bible – Every Story whispers His name (Kum 9 par lei siar thiam thei mi a si)

Resources

1.       Partnership with parents by Sandy Galea

2.       Discipling A Child’s Heart Part 1 by Sandy Galea

3.       An Open Letter to Pastors About Children’s Ministry by Dale Hudson

4.       A Church with No Children Is Terminal by Dale Hudson